Ofisa Mtendaji atupwa mahabusu kwa kutafuna fedha za shule

Tuesday, June 30, 2015

  Nkupamah blog

MKURUGENZI wa halmashauri ya wilaya ya Igunga mkoani Tabora, Rustika Turuka amemweka mahabusu Ofisa Mtendaji Kata ya Kining’inila John Maduhu, kwa tuhuma za kutafuna Sh milioni 21 za ujenzi wa maabara katika shule ya sekondari Kining’inila.

 

Akizungumza na waandishi wa habari ofisini kwake juzi, Turuka alisema mtendaji huyo aligundulika kula fedha hizo baada ya mlezi wa kata hiyo anayesimamia ujenzi wa maabara, Fedilis Mabula, kwenda katika kata hiyo na kukuta jengo halijapauliwa huku halmashauri ikiwa imetoa fedha hizo Sh milioni 21.

 

Alisema baada ya kufuatilia fedha hizo benki zilikuwa zimeshatolewa kwa nyakati tofauti, jambo lililomfanya mkurugenzi huyo kumtafuta kwa hali na mali mtendaji wa kata hiyo.

 

”Kwa kweli mtendaji huyo ameniudhi sana, mimi kama Mkurugenzi nilitoa Sh milioni 21 za kupaua jengo la maabara katika sekondari ya Kining’inila, lakini cha ajabu nimekwenda huko nimekuta jengo halijapauliwa na nilipouliza uongozi wa kata hiyo walisema fedha zimeliwa na mtendaji kata,” alisema.

 

Aidha mkurugenzi huyo alidai baada ya taarifa hiyo alilazimika kwenda hadi Benki ya NMB tawi la Igunga ili kujua kama kweli mtendaji huyo amezitoa fedha hizo benki.

 

Alipogundua fedha hizo zimetolewa alimtafuta mtendaji huyo ambaye hata hivyo alimkwepa kwa muda wa zaidi ya wiki moja hadi juhudi zilipofanyika ndipo alipokamatwa na kufikishwa kituo cha polisi huku mtendaji huyo akiwa hana hata shilingi moja.

 

Mkuu wa Upelelezi wa Makosa ya Jinai wilaya ya Igunga, Azizi Mayunga, amethibitisha kukamatwa kwa mtendaji huyo Maduhu na kusema kuwa upelelezi utakapokamilika anatarajiwa kufikishwa mahakamani kwa ajili ya kujibu tuhuma zinazomkabili.

  Nkupamah blog

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.