CCM YAUMBUKA......'Zuio uchaguzi Meya Dar 'feki' Mahakama Yakana Kuweka Zuio.

Nkupamah media:

Mahakama ya Hakimu Mkazi Kisutu

Mahakama ya Hakimu Mkazi Kisutu, imekanusha kutoa zuio la uchaguzi wa Meya wa Jiji la Dar es Salaam uliopangwa kufanyika Februari 27, mwaka huu.

 

Mahakama hiyo imesema madai kwamba ilitoa zuio la uchaguzi  huo ni ya uongo na kwamba, zuio lake lilikuwa la uchaguzi uliopangwa awali kufanyika Februari 8, mwaka huu, ambalo baadaye lilifutwa baada ya walalamikaji kutoobnekana mahakamani.

 

Uchaguzi wa Meya wa Jiji la Dar es Salaam ulikuwa ufanyike Februari 27, mwaka huu, lakini uliahirishwa baada ya Kaimu Mkurugenzi wa jiji aliyekuwa mwenyekiti wa uchaguzi huo,  Theresia Mmbando, kusoma kile alichodai ni zuio la Mahakama ya Kisutu lililokuwa linalenga kusitisha uchaguzi huo.

 

Hatua hiyo ya Mmbando ambaye  pia ni Katibu Tawala Dar es Salaam, ilizua sintofahamu iliyosababisha wajumbe wa pande mbili (CCM na wa kutoka vyama vya CUF na Chadema kwa upande mwingine), kurushiana maneno hali iliyolazimu polisi waingilie kati kumtoa kiongozi huyo wa serikali chini ya ulinzi baada ya kupata misukosuko kutoka kwa baadhi ya wajumbe.

 

Jana Hakimu Mkazi Mkuu wa Mahakama ya Kisutu, Warialwande Lema, alisema siyo kweli kwamba mahakama hiyo imetoa zuio la uchaguzi huo.

 

 “Mahakama ilitoa amri ya zuio la muda Februari 5, mwaka huu la kuzuia uchaguzi uliopangwa kufanyika Februari 8,mwaka huu … ilipanga kusikiliza maombi hayo Februari 15 lakini walalamikaji hawakufika mahakamani,” alisema na kuongeza:

 

 “Mahakama ilipanga tena maombi hayo kusikilizwa Februari 23, mwaka huu lakini pia walalamikaji hawakutokea mahakamani.” 

 

Walalamikaji katika shauri hilo walikuwa ni Susan Massawe na Saad Khimji, dhidi ya Mkurugenzi wa Jiji la Dar es Salaam.

 

Akiendelea kufafanua, Hakimu Lema alisema baada ya walalamikaji kushindwa kufika mahakamani kusikiliza maombi yao, mahakama hiyo ililiondoa maombi ya zuio yaliyokuwa yamewasilishwa  mbele yake na walalamikaji hao pamoja na zuio lililokuwa limetolewa awali.

 

 “Aliyesema mahakama imetoa zuio ni uongo kwa kuwa walitumia amri ambayo ilipitwa na wakati… sijui chochote kuhusu zuio la Februari 27, mwaka huu” alisema Hakimu Lema.

 

Kwa upande wake, Hakimu Mkazi Mkuu, Mfawidhi Cyprian Mkeha, alisema baada ya maombi hayo kuondolewa mahakamani hajapokea maombi mengine kuhusu kuzuia uchaguzi huo.

 

Februari 27, mwaka huu,  Mmbando akisoma zuio alilodai ni la mahakama alisema:  “Nimeshauriana na wanasheria zuio linadumu  kati ya miezi mitatu hadi sita, hivyo tunapaswa kuheshimu sheria za nchi na Katiba… naahirisha uchaguzi hadi taratibu zitakapokamilika.”

 

Baada ya kutoa maelezo hayo ilizuka tafrani kubwa wajumbe wa mkutano huo kutoka vyama vya Chadema na CUF ambao walikuwa wakipinga, kwa kile walichosema zuio hilo halihusiani na uchaguzi huo.

 

Akizungumza kwa njia ya simu jana, Mkurugenzi wa Masuala ya Bunge na Halmashauri wa Chadema, John Mrema, alisema wanashukuru mahakama kujitoa kwenye madai ya uongo dhidi yao.

 

“Ukweli uliotolewa na mahakama unaonyesha ni jinsi gani mhimili huo uko makini kusimamia majukumu na kuwaongezea wananchi imani kwamba hakuna aliye juu ya sheria,” alisema na kuongeza:

 

“Namuomba Rais John Magufuli kuingilia kati suala hili ili uchaguzi wa meya ufanyike jiji liweze kuendelea na shughuli wake kwa mujibu wa taratibu za nchi yetu.” 

 

Mrema alidai kuna mipango ya siri ya kuzuia uchaguzi huo usifanyike kwa kuwa baadhi ya madiwani pamoja na Mbunge wa Kawe, Halima Mdee wanashikiliwa na Jeshi la Polisi, Kanda Maalum ya Dar es Salaam.

 

Hata hivyo, Mmbando alipopigiwa simu na gazeti hili, alisema yuko hospitali ni mgonjwa hawezi kufanya mahojiano.

“Niko hospitali naumwa siwezi kufanya mahojiano…” alisema Mmbando.

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.