MOSHI:KAMPUNI YA KUUZA MAJENEZA YATOA OFA KWA MTU ATAKAE NUNUA JENEZA AKIWA HAI

Kampuni ya God Mark Funeral Director inayotoa huduma za mazishi mjini Moshi, imetoa punguzo la asilimia 30 kwa mtu atakayenunua jeneza akiwa hai.

Mkurugenzi wa kampuni hiyo Macmillan Siraki alisema kuwa, kununua jeneza mtu akiwa hai haisababishi nuksi au balaa lolote kama baadhi ya watu wanavyodhani. “Sisi kazi yetu ni kusaidia kuwapeleka mbinguni watu waliojiandaa vyema kwa kukaa karibu na Mungu wao. Tumeona tutoe punguzo mtu akinunua jeneza akiwa mzima,” alisema.

Siraki alisema bei ya majeneza yanayouzwa na kampuni hiyo ni kati ya shilingi 300,000 na 650,000 kulingana na ubora. Punguzo la asilimia 30 ni kati ya shilingi 90,000 na 195,000.

“Unajua ukishakufa hujui hata aina ya jeneza ulilozikwa nalo, lakini wapo wanaopenda wachague linalolingana na hadhi yake – hao ndio hasa tunaowalenga. Siyo jambo baya hata kidogo,” alisema.

Mchungaji wa Kanisa la Kiinjili la Kilutheri Tanzania (KKKT) Dayosisi ya Kaskazini, Samwel Msack alisema suala hilo ni zuri na mtu akinunua jeneza lake haina maana atakufa mapema. “Hata kwenye Biblia, Abraham – baba wa imani, alinunua shamba la kuzikiwa yeye, familia yake na ndugu zake kiasi cha kwa 400 kutoka kwa mtu anaitwa Banheth, mbona hakufa hapo hapo?” alihoji.

Wakili wa kujitegemea, Albert Msando alisema kwa utamaduni wa Watanzania, suala hilo linaweza kuwa gumu kwa sababu ya dhana ya watu kuogopa kifo. Alisema jambo hilo halina tofauti na kuandika wosia ambao kuna dhana imejengeka kuwa mtu akiandika atakufa haraka wakati ukweli ni kuwa hauna uhusiano na siku yako ya kifo.

HT: Mwananchi.

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.