TAMASHA LA ASASI ZA KIRAIA AZAKi 2015 LAFANYIKA UBUNGO PLAZA

@nkupamah blog on December 1, 2015 

 

Katibu Mkuu wa Wizara ya Maendeleo ya Jamii, Jinsia na Watoto Bibi Sihaba Nkinga akifungua Tamasha la 13 la AZAKi lililoandaliwa na shirika la the Foundation For Civil Society na kufanyika katika ukumbi wa Hoteli ya Blue Pearl Ubungo Dar es salaam tarehe 1/12/2015

 

Katibu Mkuu wa Wizara ya Maendeleo ya Jamii, Jinsia na Watoto Bibi Sihaba Nkinga (mwenye suti ya blue) akiwa

na baadhi ya wadau wa waliohudhuria Tamasha la 13 la AZAKi lililoandaliwa na shirika la the Foundation For Civil Society na kufanyika katika ukumbi wa Hoteli ya Blue Pearl Ubungo Dar es salaam tarehe 1/12/2015.

………………………………………………………………………………………………….

Erasto T. Ching’oro, Msemaji – Wizara ya Maendeleo ya Jamii, Jinsia na Watoto

Wadau wa Asasi za Kiraia wamekutana ukumbi wa Blue Pearl Ubungo Dar es salaam kuanzia tarehe 1- 2/12/2015 kushiriki Tamasha la maonesho ya shughuli zinazotekelezwa na mashirika yasiyokuwa ya kiserikali.

Akizindua Tamasha hilo la siku mbili, Katibu Mkuu wa Wizara ya Maendeleo ya Jamii, Jinsia na Watoto Bibi Sihaba Nkinga, ametoa shukrani kwa shirika la the Foundation for Civil Society kwa kuandaa Tamasha hilo la Kumi na Tatu la mwaka 2015 lenye Kauli Mbiu: ‘Wajibu wa Asasi za Kiraia katika Utekelezaji wa Malengo ya Maendeleo Endelevu 2030’.

Katibu Mkuu wa Wizara hiyo yenye dhamana ya kusimamia na kuratibu shughuli za AZAKi hapa nchini ameeleza kufurahishwa na wadau wa AZAKi kwa kuendelea kushiriki na kuchangia katika jitihada za kuleta maendeleo ya jamii na taifa kwa ujumla. Ameongeza kuwa ushiriki na kauli mbiu ya Tamasha la mwaka 2015 ni ushahidi tosha kuwa AZAKi na Mashirika Yasiyo ya Kiserikali ni wabia muhimu katika maendeleo.

Akimkaribisha mgeni rasimi, Bibi DKT. Stigmata Tenga ambaye ni Rais wa Foundation for Civil Society alieleza kuwa malengo ya Tamasha ni Kutoa fursa kwa washiriki kujadili na kuainisha masuala yatakayozingatiwa na jinsi ya kuimarishsa ushiriki mpana wa wananchi na Asasi za Kiraia (AZAKi) na kuyapa kipaumbele wakati wa utekelezaji wa Malengo ya Maendeleo Endelevu. Aidha, Tamasha hilo litajenga jukwaa kwa wadau wa AZAKi kujadili namna ambavyo Foundation for Civil Society itaboresha huduma za kujenga uwezo wa Asasi za Kiraia nchini kwa kutoa ruzuku na huduma za kuimarisha uwezo wa asasi kiutendaji na kiutawala.

Tamasha la Azaki linakutanisha takribani wadau 300 kutoka mikoa mbalimbali hapa nchini. Bibi Nkinga amaeleza kuwa fursa hii itatumiwa na wadau kujenga uelewa wa pamoja kuhusu Malengo ya Maendeleo Endelevu na kuweka mikakati ya kukuza ushiriki katika utekelezaji wa malengo hayo kwa kuzingatia misingi ya uwazi, uwajibikaji na ushirikishaji wa jamii. Amewaasa wadu kushiriki katika mchakato wa kuandaa Malengo Mapya ya Maendeleo endelevu ya mwaka 2030 kusaidia kuwafahamisha washiriki wengine mchakato uliotumika kuandaa Malengo hayo ili wayafahamu na kuyatekeleza kwa lengo la kufanikisha azma ya kuondoa umasikini kwa kushirikiana na Serikali na wadau wengine.

Akifafanua Bibi Sihaba amewataka wadau kutumia Tamasha la Azaki kujadili kwa kina Mafanikio, Changamoto na mambo ya msingi waliyoyabaini wakati wa utekelezaji wa Malengo ya Milenia.Kwani madaliano ya washiriki yataweka msingi wa uelewa wa pamoja na kuwawezesha kujipanga vizuri katika utekelezaji wa Malengo ya Maendeleo Endelevu.

Itakumbukwa kwamba, baada ya kutolewa kwa Malengo ya Maendeleo ya Milenia yaliyopita, nchi yetu iliandaa mikakati madhubuti ya kuitekeleza. Mikakati hiyo ikiwa ni pamoja na MKUKUTA (Tanzania Bara), MKUZA kwa Zanzibar na Mpango wa Maendeleo wa Miaka 5. Mikakati hii ilikuwa na vipaumbele pamoja na viashiria vya kupima na kufuatilia ili kuhakikisha kuwa tunafikia Malengo yaliyowekwa.

Katika utekelezaji wa Malengo ya Milenia kama nchi tuliweza kupata mafanikio makubwa katika maeneo mablimbali ikiwa ni pamoja na: Kuongezeka kwa idadi ya wanafunzi wanaoandikishwa mashuleni; Kuongezeka kwa Idadi ya wanawake katika vyombo vya maamuzi kama Bunge hadi kufikia Asilimia 30; Ongezeko la uwiano wa wanafunzi wa kike na wakiume katika shule za Msingi na shule za Sekondari; Tanzania imeweza kupunguza kwa Asilimia 70 (2/3) vifo vya watoto wenye umri chini ya miaka 5; na Kupungua kwa vifo vya mama na mtoto. Mengine ni Kupungua kwa kiwango cha maambukizi ya Virusi vya UKIMWI kwa watu wenye umri kati ya miaka 15-24 na 25-49; na Kuongezeka kwa idadi ya wananchi wanaotumia maji safi na salama ya kunywa. Katibu mkuu Bibi Nkinga amaeleza kuwa mafanikio haya yamefanikiwa kwa ushirikiano tahbiti wa AZAKi na Serikali.

Awali, Mkurugenzi Mtendaji wa Foundation For Civil Society Bw. Francis Kiwanga alimjulisha Mgeni Rasimi kuwa Tamasha la AZAKi 2015 litakuwa na mada nne amabzo ni: Wajibu na mikakati ya kuimarisha ushiriki wa asasi za kiraia katika utekelezaji wa Malengo ya Maendeleo Endelevu; Wajibu wa Sekta Binafsi katika utekelezaji wa Malengo ya Maendeleo Endelevu; Wajibu wa Serikali katika utekelezaji wa Malengo ya Maendeleo Endelevu; na Utunishaji Mfuko na Ugharamiaji wa Mpango wa Maendeleo endelevu. Rai imezidi kutolewa kuzingatia upatikanaji wa rasilimali kutoka ndani na nje ya nchi katika kutekeleza Malengo Endelevu ya Maendeleo.

Katibu Mkuu Nkinga ameongeza kuwa yeye ni mmoja wa wanaoamini kuwa bila Asasi za Kiraia makini zenye uzalendo zinazotanguliza maslahi ya taifa hatutaweza kuwa na Tanzania tunayohitaka miaka ijayo. Hivyo katika mijadala mnatakiwa kuzingatia wajibu mkubwa wa AZAKi kwa jamii katika kuchangia kufikiwa kwa malengo ya maendeleo endelevu, tunapaswa kupitia upya dhamira zetu na kuwa tayari kujifunza kwa wengine ili kuimarisha utendaji wa Asasi zetu na kutoa mchango unaokusudiwa. Amewasihi kufanyakazi kazi kwa juhudi na maarifa ili kuunga mkono dhamira ya Mhe. Rais Dkt. John Pombe Magufuli ya kuwawezesha Watanzania kujiletea maendeleo yao na kuondokana na umasikini kupitia kauli mbiu ya HAPA KAZI TU!

Watendaji wa AZAKI wametakiwa kuongeza uwazi na uwajibikaji kwa wadau mbalimbali hususan kwa jamii, serikali, wanachama, wafadhili na makundi maalum. Hapana buni kuwa na miundo na taratibu zenye uwazi, ushirikishaji na uwajibikaji. Utamaduni huu ukiendelezwa sio tu kwamba mtajijengea uhalali kwa wananchi na jamii bali pia AZAKi zitaweza kuimarisha ubia na Serikali katika ngazi zote.

Mwisho, Bibi Sahiba aliwataka wadau wa Asasi za Kiraia kurejea maneno ya Muasisi wa Taifa Letu Hayati Mwalimu Julius Kambarage Nyerere kutoka katika Kitabu chake cha ‘Uhuru na Maendeleo’ ambaye aliwahi kusema: “Mtu anaendelea ikiwa uwezo wake umekua au kipato chake kimeongezeka kumwezesha yeye na familia yake kuishi maisha bora zaidi; Mtu haendelei kwa kutegemea kupewa vitu na watu wengine” (1973).

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.