Kesi Ya Uhujumu Uchumu.............Masamaki, Wenzake Wazidi Kukabwa Koo.

Nkupamah media:

Mamlaka ya Mapato Tanzania (TRA)

Mahakama ya Hakimu Mkazi Kisutu, imekubali maombi ya ofisi ya Mkuu wa Upelelezi wa Polisi Kanda Maalumu ya Dar es Salaam (ZCO) ya kuwahoji tena Kamishna wa Forodha na Ushuru wa Mamlaka ya Mapato Tanzania (TRA),Tiagi Masamaki (56), na wenzake saba.

 

Masamaki na wenzake wanakabiliwa na mashitaka ya uhujumu uchumi, ikiwamo kuidanganya serikali na kuisababishia hasara ya Sh. bilioni 12.7.

 

Hatua hiyo imefikiwa jana na Hakimu Mkazi Mkuu Huruma Shahidi, baada ya ZCO kuwasilisha maombi ya kuendelea kuwahoji washtakiwa hao, ofisini kwake.

 

Hakimu Shahidi alisema amepokea barua ya kuomba kibali cha kwenda kuwahoji tena washtakiwa lakini haijaeleza kuhusu nini na kwamba mahakama yake haina pingamizi.

 

Mbali na Masamaki, washtakiwa wengine ni Meneja wa Kitengo cha Huduma za Ushuru, Habibu Mponezya (45), Burton Kaissy (51), Msimamizi Mkuu wa Bandari Kavu ya Azam (ICD – Azam), Eliachi Mrema (31), Mchambuzi Mwandamizi wa Biashara TRA, Khamis Omary (48), maofisa wa Kitengo cha Mawasiliano ya Kompyuta (ICT – TRA), Haroun Mpande (28), Raymond Louis (39) na Ashraf Khan (59) wote wakazi wa jijini.

 

Jana, Wakili wa Serikali Esteria Wilson, alidai mahakamani kwamba upelelezi wa kesi hiyo haujakamilika.

 

Katika kesi hiyo, upande wa Jamhuri ukiongozwa na Wakili wa Serikali Mkuu Timon Vitalis, uliwasomea washtakiwa hao mashitaka yao. Alidai kuwa kati ya Juni Mosi na Novemba 17, mwaka jana, siku isiyofahamika, washitakiwa walikula njama ya kutenda kosa la kuidanganya serikali.

 

Ilidaiwa kuwa walikula njama  kwamba makontena 324 yailiyokuwa bandari kavu ya Azam yametolewa baada ya kulipiwa kodi huku wakijua si kweli.

 

Vitalis alidai katika shitaka la pili siku na tarehe ya tukio la kwanza, washtakiwa wote kwa pamoja walishindwa kutimiza majukumu yao na kusababishia serikali hasara ya Sh. Bilioni 12.7.

 

Hakimu Shahidi alisema kwa kuwa mahakama hiyo haina mamlaka ya kusikiliza kesi za uhujumu uchumi, washtakiwa hawakutakiwa kujibu chochote hadi upelelezi utakapokamilika na kuhamishiwa Mahakama Kuu Tanzania, Kanda ya Dar es Salaam.

 

Washtakiwa waliwasilisha maombi ya dhamana Mahakama Kuu na wako nje kwa dhamana.

 

Novemba 27, mwaka jana, Waziri Mkuu Kassim Majaliwa alifanya ziara ya kwanza ya kikazi na ya kushtukiza katika bandari ya Dar es Salaam na kuibua kashfa hiyo ya wizi wa makontena na ukwepaji wa kodi wa Sh. bilioni 80.

 

Katika ziara hiyo, Waziri Mkuu alikutana na viongozi waandamizi wa Mamlaka ya Usimamizi wa Bandari Tanzania (TPA) na TRA na kubaini wizi wa makontena 349 uliotokana na ukwepaji wa kulipa kodi.

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.